Ранішні вецер у акне

Кніжная серыя Выдавецкага дома “Звязда” “Сябрына: паэзія народаў Расіі” – чарговы мост літаратурнай дружбы, які звяжа беларускіх чытачоў з творамі расійскіх таленавітых літаратараў.
Першай кнігай серыі, якая пабачыла свет, стаў зборнік вершаў “Ранішні вецер у акне” Вячаслава Ар-Сяргі — члена Саюза пісьменнікаў Расіі, лаўрэата рэспубліканскай літаратурнай прэміі імя Флора Васільева, заслужанага работніка культуры Удмурцкай Рэспублікі, празаіка, паэта, драматурга. Пераклады твораў Вячаслава Ар-Сяргі выходзілі на розных мовах свету, па-беларуску ж яны загучалі дзякуючы намаганням вядомага айчыннага літаратара Віктара Гардзея.
Чым жа могуць прывабіць вершы Вячаслава Ар-Сяргі? Сваёю прастатой, звыкласцю і “звычайнасцю” мовы, шчырасцю інтанацыі і жыццёвасцю вобразаў. Можа падацца, што некаторыя радкі – гэта пэўны выклік чытачу, але пра што б ні пісаў аўтар – пра горкі адчай ад кахання, якое растала, ці пра залішнюю мітуслівасць кожнага дня – усе яго словы ідуць ад самой душы.